சர்வதேசப் பல்கலைக்கழகங்களுடன் வடபுல மாணவர்களை இணைக்கும் "Study In யாழ்ப்பாணம்" கல்வி நிறுவனம் கோலாகலமாகத் திறப்பு!

வடபகுதி மாணவர்களின் சர்வதேச உயர்கல்விக் கனவை நனவாக்கும் நோக்குடன், சர்வதேசப் பல்கலைக்கழகங்களுடன் அவர்களை நேரடியாக இணைக்கும் "Study In யாழ்ப்பாணம்" கல்வி நிறுவனத்தின் பிரமாண்ட திறப்பு விழா இன்று (08) யாழ்ப்பாணம் வேம்படிச் சந்தியில் அமைந்துள்ள அதன் தலைமையகத்தில் வெகுவிமரிசையாக நடைபெற்றது.

வடமாகாண ஆளுநர் கௌரவ நா. வேதநாயகன் மற்றும் யாழ். மாவட்ட அரச அதிபர் ம. பிரதீபன் ஆகியோர் பிரதம அதிதிகளாகக் கலந்துகொண்டு, நாடா வெட்டி நிறுவனத்தின் செயற்பாடுகளை உத்தியோகபூர்வமாக ஆரம்பித்து வைத்தனர். முன்னதாக, விழாவிற்கு வருகை தந்த அதிதிகள் மங்கள வாத்தியங்கள் முழங்க, மாலை அணிவித்து கௌரவத்துடன் மேடைக்கு அழைத்து வரப்பட்டனர்.

"கற்க மறுப்பவர் வாழ மறுப்பவர்" எனும் பழந் தமிழ் முதுமொழிக்கு ஏற்ப, வடக்கு மக்களின் கல்வித் தேடலுக்குப் புதிய உத்வேகம் அளிக்கும் வகையில் இந்த நிறுவனம் நிறுவப்பட்டுள்ளது. வடபகுதியில் திறமை மிக்க மாணவர்கள் இருந்தும், அரச பல்கலைக்கழகங்களில் நுழைவதற்கான வாய்ப்பு கிடைக்காத மாணவர்களுக்கு, சர்வதேசத் தரம் வாய்ந்த உயர்கல்வியைத் தொடர இதுவொரு சிறந்த நுழைவாயிலாக அமையும் என நிறுவனத்தின் பணிப்பாளர் சபை இதன்போது நம்பிக்கை வெளியிட்டது.

இந்த வரலாற்றுச் சிறப்புமிக்க நிகழ்வில் பின்வரும் முக்கிய பிரமுகர்கள் கலந்துகொண்டு சிறப்பித்தனர்:கலாநிதி ஆறு திருமுருகன் (ஸ்தாபகர், சிவபூமி அறக்கட்டளை)ஜெறோம் செல்வநாயகம் (யாழ். மறைமாவட்டம்)மதிவதனி விவேகானந்தராஜா (யாழ். மாநகர முதல்வர்) சந்திரமௌலி லலீசன் (அதிபர், கோப்பாய் ஆசிரியர் பயிற்சி கலாசாலை)

ரிஷ்வான், ரிஸ்மி (பணிப்பாளர்கள், "Study In யாழ்ப்பாணம்")ஐயாத்துரை கஜமுகன் (செயற்பாட்டுத் தலைவர்) என்போர் கலந்து கொண்டனர்

நிகழ்வில் உரையாற்றிய விருந்தினர்கள், வடபகுதி மாணவர்களின் கல்வித் தரத்தைச் சர்வதேச மட்டத்திற்கு உயர்த்துவதிலும், உலகளாவிய வாய்ப்புகளை அவர்களுக்கு அண்மிக்கச் செய்வதிலும் இக்கல்வி நிறுவனம் ஒரு முக்கிய மைல்கல்லாகத் திகழும் எனத் தெரிவித்தனர்.

இந்தத் திறப்பு விழாவானது யாழ். கல்விச் சூழலில் ஒரு புதிய அத்தியாயத்தைத் திறந்து வைத்துள்ளதாக சமூக ஆர்வலர்கள் கருத்துத் தெரிவித்துள்ளனர்.