இலங்கையில் ஊடகத் தொழில்முறை நிபுணர்களுக்கான பட்டய நிறுவனம் அமைக்க சட்டமூலம் வர்த்தமானியில் வெளியீடு!

 இலங்கையில் ஊடகத் தொழில்முறை நிபுணர்களுக்கான பட்டய நிறுவனம் அமைக்க சட்டமூலம் வர்த்தமானியில் வெளியீடு!

தொகுப்பு: ஆஷிகா பர்ஸான்

இலங்கையில் ஊடகத் துறைக்கான தொழில்முறை தரநிலைகளை அறிமுகப்படுத்தி மேம்படுத்தும் நோக்கில், "இலங்கை பட்டய ஊடகத் தொழில்முறை நிபுணர்கள் நிறுவனம்" (Chartered Institute of Media Professionals of Sri Lanka) அமைப்பதற்கான சட்டமூலம் அரசாங்கத்தால் வர்த்தமானியில் வெளியிடப்பட்டுள்ளது.

2026 ஆம் ஆண்டு ஜூன் 5 ஆம் திகதியிட்ட அதிவிசேட வர்த்தமானியின்படி, இந்த நிறுவனம் ஒரு கூட்டுத்தாபனமாக உருவாக்கப்படவுள்ளது. உறுப்பினர்களைப் பதிவு செய்தல், பயிற்சித் திட்டங்களை நடத்துதல், பரீட்சைகளை நடத்துதல், தொழில்முறை தகைமைகளை மேம்படுத்துதல் மற்றும் ஊடகத் துறையில் உயர்ந்த தரநிலைகளை நிலைநிறுத்துதல் ஆகிய அதிகாரங்கள் இந்த நிறுவனத்திற்கு வழங்கப்படவுள்ளன.

பிரதான நோக்கங்கள்:

* தகுதி பெற்ற ஊடகத் தொழில்முறை நிபுணர்களைப் பதிவு செய்தல்.

* அவர்களுக்கான பயிற்சி மற்றும் திறன் மேம்பாட்டு நடவடிக்கைகளை முன்னெடுத்தல்.

* ஊடக ஆய்வுகள் மற்றும் ஆராய்ச்சிகளை மேற்கொள்ளுதல்.

* ஒழுக்கக் கோவையின் (Code of Ethics) மூலம் தொழில்முறை ஒழுக்கத்தைப் பேணுதல்.

* உள்நாட்டு, சர்வதேச ஊடக நிறுவனங்களுடன் ஒத்துழைப்பை மேம்படுத்துதல்.

*ஊடகத் தொழில்முறை நிபுணர்கள் யார்?*

இந்தச் சட்டமூலத்தின்படி செய்தியாளர்கள், ஆசிரியர்கள், வெளியீட்டாளர்கள், ஒளிபரப்பாளர்கள், செய்தி வாசிப்பாளர்கள், நிகழ்ச்சித் தொகுப்பாளர்கள், ஊடக உரிமையாளர்கள், ஊடக முகாமையாளர்கள், ஊடகக் கல்வியாளர்கள், ஆய்வாளர்கள், தொழில்நுட்ப நிபுணர்கள், உள்ளடக்க உருவாக்குநர்கள் (Content Creators) மற்றும் ஒளிப்பதிவாளர்கள் உள்ளிட்டோர் ஊடகத் தொழில்முறை நிபுணர்களாக வரையறுக்கப்பட்டுள்ளனர்.

*நிர்வாகக் கட்டமைப்பு:*

இந்நிறுவனம் ஊடகத் துறையைப் பிரதிநிதித்துவப்படுத்தும், தெரிவு செய்யப்பட்ட மற்றும் நியமிக்கப்பட்ட உறுப்பினர்களைக் கொண்ட ஆளும் சபையினால் (Governing Council) நிர்வகிக்கப்படவுள்ளது. நிரந்தரச் சபை அமைக்கப்படும் வரை, அமைச்சரினால் நியமிக்கப்படும் இடைக்காலச் சபை இதன் ஆரம்பக் கட்ட நடவடிக்கைகளைக் கண்காணிக்கும்.

சுகாதார மற்றும் வெகுஜன ஊடக அமைச்சரின் உத்தரவின் பேரில் இந்த சட்டமூலம் வர்த்தமானியில் வெளியிடப்பட்டுள்ளதுடன், இது சட்டமாக அமலுக்கு வருவதற்கு முன்னர் நாடாளுமன்றத்தின் அங்கீகாரத்தைப் பெற வேண்டும்.